दोभान अग्निपीडितलाई इसाई समाजद्वारा आर्थिक तथा सत्य साई सेवा संगठनद्वारा भौतिक सहयोग

रेडियो ताप्लेजुङ

कार्तिक २ गते । दोभान अग्निपीडितलाई विभिन्न निकायहरूबाट सहयोग जुट्ने क्रम जारी छ। जसअनुसार सोमबार इसाई समाजले आर्थिक तथा श्री सत्य साई सेवा संगठनले भौतिक सहयोग गरेका छन्।

विपद् व्यवस्थापन समिति मेरिङदेन गाउँपालिकाका अनुसार इसाई तथा क्रिस्टियन समाज ताप्लेजुङको समन्वयमा कोशी प्रदेश इसाई समाज र ताप्लेजुङ जिल्लाका सबै पालिका समाजको संयुक्त सहयोगमा ३ लाख ७६ हजार ७१० रुपैयाँ आर्थिक सहयोग गरिएको छ।

उक्त सहयोग रकम आगलागीबाट भएको क्षतिको विवरणअनुसार पीडित परिवारलाई प्रदान गरिएको गाउँपालिकाले जनाएको छ।

त्यस्तै, आजै सत्य साई सेवा संगठन नेपालले ब्ल्याङ्केट, सिरानी, तन्ना, डस्नालगायतका सामग्री पीडित परिवारहरूलाई हस्तान्तरण गरेको छ।

गत असोज ८ गते दिउँसो भएको आगलागीबाट साढे १४ करोड रुपैयाँभन्दा बढी क्षति भएको विवरण सार्वजनिक भएको छ। भौतिक रूपमा उपस्थित भएर राहत पुर्‍याउन असम्भव भए पालिकाले सञ्चालनमा ल्याएको ‘प्रकोप व्यवस्थापन खाता’मा समेत रकम सहयोग गर्न सकिने गाउँपालिकाले जनाएको छ।

सूचना : यस रेडियो ताप्लेजुङको वेबसाइटमा प्रकाशित समाचार कुनै पनि छापा वा डिजिटल माध्यममा बिना अनुमति कपी गरी प्रकाशन वा प्रसारण नगरिदिनुहोला। स्पष्ट स्रोत नखुलाएमा विद्युतीय ऐन अन्तर्गत भइ जाने व्यहोरा जानकारी गराइन्छ ।